أعلن محمد عبد المنعم، لاعب منتخب مصر ونيس الفرنسي، عن عودته للتدريبات الجماعية بعد انتهاء فترة إصابته بقطع في الرباط الصليبي. عبر حسابه على فيس بوك، عبّر عن مشاعره بعد هذه الفترة الصعبة التي مرت عليه، حيث قال:
“الحمد لله دائمًا وأبدًا، النهارده أول يوم تمرين لي بعد فترة هي الأصعب في حياتي، دخلتني في اكتئاب وتوتر من المستقبل، خلتني أشوف مستقبلي بشكل مختلف عن اللي كنت بحلم بيه، لكن التفكير هنا طول الوقت مش هسيب حلمي، وأني أقدر أعدي أي مرحلة صعبة. حسيت بكمية الحب والتعاطف والدعم معايا لما حصلت الإصابة، وده أثر عليّ نفسيًا، لكن في نفس الوقت خلاني أحس بالمسؤولية. كنت بشتغل وهدفي قدام عيني، هرجع تاني وأكون عند حسن ظنهم، ومن هنا حسيت إن كل حاجة أنا وصلتلها مكنش شطارة مني، ده كانت ترتيبات ربنا ليا، قربت منه أكتر، حسيت بالرضا.”.
تحدث عبد المنعم عن شعوره بأن الله معه، مما منحه راحة نفسية، وأضاف:
“النجاح مهم جدًا، لكن الأهم منه هو علاقتك مع ربنا، ومن أهم النعم الناس اللي بتحبك بصدق، وجودهم في حياتك بيخليك إنسان أحسن. اتعلمت أن أكون حامدًا من غير شروط، أسعى وأشتغل وأتعب، لكن في نفس الوقت أحافظ على كنوزي الحقيقية، أهلي وأصحابي، والقلوب اللي بتقف جنبك في كل لحظة. لأن دول هم اللي بيفضلوا يوم ما تتعب أو تمرض، واللي بيفضل فعلاً هو الذكريات والدعوات الحلوة.”.
وفي ختام حديثه، أكد على أهمية الذكريات، حيث قال:
“لأن الاستثمار الحقيقي هو الاستثمار في الذكريات، بيخلي اللحظات تعيش فوق عمر الإنسان. شكرًا من قلبي لكل واحد افتكرني وبعت كلمة أو دعا لي، وجودكم حواليّا بيكبر المعنى ويطول عمر اللحظات الحلوة، شكرًا على دعمكم.”.